Pat Fleury

Bhí slua mór – 21447 – i láthair i bPáirc Uí Nualláin Dé Domhnaigh seo caite chun coimhlint eile idir na seanchairde seo a fheiceáil. Bhí atmasféar craoibhe le boladh san aer ar an lá agus lucht leanta ón dá thaobh ag tnúth lé sárchluiche. Ní dóigh liom go raibh díomá orthu dá bharr san ag an deireadh. Bhí an cluiche iomarcach go deo ó thus agus ag an deiredh ní raibh ach scór amháin eatarthu. Chuir Cill Chainnigh Micheal Fennelly isteach mar leaththosaí lár sa chéad leath agus rinne sé scrios. D’aimsigh sé 2-3 sa tréimhse sin agus rinne na scóranna sin an difríocht ag an deireadh. Bhí an coimhlint i lár na páirce an-suimiúil agus d’imir Brendan Maher go hana mhaith sa chead leath agus fuair sé 0-3 agus d’imir Lester Ryan go maith arís, mar a rinne sé gach lá sa Sraith i mbliana. Is cosúil go bhfuil áit bainte amach dó féin don gcraobh ar an bhfoireann. Níl Páirc Uí Nualláin chomh fairsing le cuid páirceanna eile agus bhí buntaiste ag na cosainteoirí dá bharr seo. Taitníonn spás le tosaithe Thiobraid Árann ach bhí sé gann go leor agus sreachail cuid acu chun marc a dhéanamh ar chúrsaí. Ag deireadh an chluiche ní raibh duine de na tosaithe sin fágtha ar an bpáirc ag Tiobraid Árann agus b’fhéidir go n-insíonn sé sin a scéal féin dúinn. Sin ráite, bhí seansanna ag an dá thaobh chun an cluiche a bhuachaint ach tá na Cait go hiontach i gcásanna mar sin – taispeánann siad an ghoile atá ag teastáil, faigheann siad na scóranna cinniúnacha agus ní thugann siad mórán seansanna don bhfreasura. Mar sin, tús maith don bhliain ag an dá thaobh ach corn eile buaite ag Cill Chainnigh. Bliain nua ach níl mórán athrú lé feiceáil.

Pat Fleury, blog GAA Beo

Fiachra Breathnach

Ba iontach an bheart a bhí déanta ag an dá chontae seo agus trí chraobh chúigí bainte amach acu as a chéile faoi 21. B’iad an Cabhán is láidre a thosaigh le pointí mhaith ó Paul O’Connor agus Enda Reilly. Bhí O’Connor go h-áirithe ar fheabhas ar feadh an chluiche agus thug sé a dhóthain le déanamh do Damien Cahalane.

D’imir an Cabhán le cóir mhaith gaoithe ach níor imir siad ach beirt tosach taobh istígh den líne cúig mhéadar is daichead don chuid is mó den chéad leath. Dá mbeadh siad beagán níos cróga ag ionsaí sa gcéad leath, cheapfainn go mbeadh deacrachtaí ag chúlaithe Chorcaigh iad a choinnéail.

Bhí fadhb eile ag an Cabhán sa gcéad leath, bhí neart seilbh acu ach níor bhrís siad ag luas ach iad sásta dul trasna na páirce in áit direach ar aghaidh.

É sín ráite, bhí Corcaigh ag fáil scóranna i bhfad níos éasca agus bhí Mark Sugrue agus John O’Rourke feiceálach sa chéad leath. Is cosúil go raibh córas i bhfeidhm ag an Cabhán chun Darragh Sexton a fhágail saor os comhair an líne lánchúil chun iad a chosaint. Bhí sé sín togha ach d’fhág sé sin Sugrue le neart spás aige agus bhí sé contúirteach ag teacht ar an ruathair ó lár na páirce.

Thosaigh Corcaigh an dara leath dhá phointe chun cinn agus de bhrí sín bhí ar an Cabhán ionsaí ach is amhlaidh a tharla. Tháinig Brian Hurley isteach go mór sa gcluiche agus d’aimsigh sé dhá phointe ón imirt go scioptha. Fuair Corcaigh dhá phointe eile agus d’fhág sé sin an iomarca le déanamh ag an fhreasúra.

Caithfear creidiúnt a thabhairt do leaids an Chabhán mar tháispéain siad an teacht aniar sa cúpla noiméad dheireanach. Bhí tionchar mhór ag Conor Moyna ar an imirt nuair a tháinig sé isteach agus d’athraigh sé an tsruth i lár na páirce. Fuair an Cabhán cúl in aghaidh na h-imeartha agus bhí cluiche again arís! Nach é Brian Tyers a bhí sásta!

Ba cheart go mbeadh imreoirí an Chabhán bródúil don iarracht a chur siad isteach, níor thug siad suas ar feadh oiread is soicind.

Is dócha go raibh Corcaigh ciontach gur luí siad ar na máidí rámha tamall sa dara leath ach nuair a theastaigh scóranna uathu d’aimsígh siad iad. Agus iad ag tabhairt aghaidh ar Ghaillimh sa chluiche ceannais caithfear an méid seo a rá, tá tósaithe den scoth ag Corcaigh. Chuile chluiche go dtí seo bhí phríomhaimsitheoir difrúil acu. In aghaidh Ciarraí sé Dan Mac Eoin a rinne an damáiste, sé Hurley a bhí mar phríomh-aimsitheoir in aghaidh Luimneach agus Cadogan in aghaidh Tiobráid Árainn.

Cinnte is udár imní a bheidh anseo do Ghaillimh agus triúr cosantóirí gortaithe ón lá cheanna.

Fiachra Breathnach, blog GAA Beo

Máire Ní Bhraonáin

Chas Uibh Fhailí agus Ros Comáin ar a chéile i bPáirc na nGael i Luimneach Dé Satharn seo caite. Beidh Uibh Fhailí ag imirt i Roinn a trí an bhliain seo chugainn tar éis an bua a fháil. Ní raibh ach dhá chúilín idir na foirne ag deireadh an chluiche.

Thaispeáin an dá fhoireann árd chaighdeán imeartha sa chluiche seo ach caithfear a admháil go mbeidh aiféal ar mhná Ros Comáin leis an méid iarrachtaí a chuireadar ar foiréail sa chluiche. Thosaigh an dá fhoireann go scioptha agus níor thóg sé i bhfad ar Michelle McGrath a céad scór a aimsiú. D’oibrigh Uibh Fháillí le deiseanna maithe a chruthú ag tús an chéad leath agus bhain siad úsáid chruinn as seilbh na liathróide.

Bhí Roscomáin chun tosaigh le dhá chúilín sular aimsigh Uibh Fhailí sé chúilín gan fhreagra. Ba í Mairéad Daly a chur dhá chic saor that an trasnán do Uibh Fhailí. B’iontach an cluiche a bhí ag Lorraine Keena sa líne leath thosach, a scóráil cúig chúilín roimh leath ama.

D’oibrigh Natalie Mc Hugh agus Áine O’Brien go crua sna tosaithe do Ros Comáin ach níor tugadh morán saoirse dóibh. Chuir sé iontas orm nár fhan captaen na foirne, Niamh Nic an Bhaird istigh sa líne lán tosach. Cé go raibh sí ag fáil seilbh na liathróide amuigh i lár na páirce, bhí sé ró-fhada ón gcúl le scóranna a aimsiú. Ag leath ama, bhí bearna ceithre chúilín idir na foirne ach rinne Ros Comáin an-theacht aniar le ceithre scór gan fhreagra.

Caithfear a admháil gur ionspráideach an taispeántas a thug Siobhán Flannery i lár na páirce ó thús an chluiche. Bhí sí an-éifeachtach agus is í a fuair laoch an chluiche le trí chúilín an-tábhachtach ón imirt.  Chaill Ros Comáin seans ar chúl nuair a shabháil an cúlbáire, Laura Devery iarracht ar chúl ó Áine O’Brian. Tugadh seans eile do Rachel Ryan luath go leor sa dara leath ach bhlocáil Christine McDonnell an ceann sin.

Ní dhearna Linda Sullivan aon bhotún nuair a chríochnaigh sí gluaiseacht álainn do mhná Uibh Fháillí san angach agus ag an bpointe sin, bhí Uibh Fháillí cúig chúilín chun tosaigh. Is iad a bheas ag imirt i Roinn a trí an bhliain seo chugainn. An scór deiridh ná Uibh Fháillí 1-14 Ros Comáin 0-15.

Máire Ní Bhraonáin, blog Peil na mBan Beo

Cathal Moore

Thosaigh Cill Chainnigh go maith sa chluiche seo inniú agus cé gur bhuaigh siad caitheamh an euro shocraigh Colin Fennelly imirt in aghaidh na gaoithe. An scéal is mó sa chéad leath ná an taispeántas a thug Michael Fennelly ar an daichead slat. Rinne sé scrios ar Phadraic Maher agus bhí 2-03 aimsithe aige ón imirt roimh leath ama. Beidh Darren Gleeson an-díomách leis an dara cúl a fuair Fennelly.  Bhí an coimhlint lár páirce idir Brendan Maher agus Michael Rice an-suimiúil freisin. Tugadh saoirse na páirce do Noel McGrath agus cé gur aimsigh sé trí chúilín ón imirt fágadh Kieran Joyce saor ró-mhinic.

D’imir Michael Cahill agus Kieran Bergin ar fheabas i measc na gcosantóirí.  Ar an taobh eile bhí an líne lán cúil de Paul Murphy, JJ Delaney agus Jackie Tyrrell dochloíte.

Thug Barry Kelly dhá chárta dearg do Corbett a bhí ciúin go maith agus do JJ Delaney ach d’fhéadfadh ceann eile a bheith faighte ag Paul Curran mar gheall ar an bhfeall a rinne sé ar Mhicheal Rice sa dara leath.

Mar sin sraith eile do na Cait agus tuillte go maith acu.  Ná dean dearmad go mbeidh Henry Shefflin, Richie Power agus TJ Reid fós le teacht ar ais. Is cinnte go mbeidh athrú nó dhó ann don chraobh.  Obair le déanamh ag Tiobraid Árann.  Is sna tosaithe a bhí formhór na fadhbanna acu. Arís níor scóráil siad cúl agus níor aimsigh na tosaithe a thosaigh ach cúig chúilín ón imirt.

Bhí na coinníollacha thar cionn inniú i bPáirc uí Nualláin.  Cluiche an-thaitneamhach ó thus deireadh.  Leanann na Cait ar aghaidh agus iad ag dul ó neart go neart.  An féidir iad a stopadh?

Cathal de Mórdha, blog GAA Beo

Donal O’Grady

Dé Domhnaigh seo chaite i bPáirc Uí Nualláin níl aon dabht ach gurb iad Na Cait an fhoireann ab fhearr. Nuair a fhaigheann Cill Chainnigh tosach maith ort tá sé thar a bheith deacair buacan orthu. Thug cúil Mick Fennelly muinín agus spioraid dá fhoireann agus lig sé dóibh a gcuid cosainteoirí fanacht ina n áiteanna agus brú a chur ar Tipp iad a oscailt suas. Ach ní raibh siad in ann. Ní raibh Tipp as an gcluiche go hiomlán riamh ach fiú nuair a chuir siad an cluiche ar chomhscór sa dara leath níor fhéach sé riamh go rachadh siad ar aghaidh chun é a bhuacan. Caithfidh me a rá go raibh ionadh orm nuair a chonaic me na taicticí a bhi in úsáid ag Tipp – triúr i lár na páirce; sin ceart go leor ach gan ach beirt sa leath líne tosaigh. Fágadh leathchulaí Chill Chainnigh Kieran Joyce

leis féin agus bhí sé in ann scuabadh suas taobh thiar dá lár páirce agus chiallaigh sé go raibh Lar Corbett a mharcáil ag beirt – Joyce chun tosaigh agus Brian Hogan ar chúl. Ní dhearna Cill Chainnigh ach Aidan Fogarty a chur isteach mar an triú duine i lár na páirce chun an comhmheá i lár na páirce a chothramú. Chomh maith leis sin bhí Seamus Callanan istigh sa chúinne ar chlé, marcáilte ag Paul Murphy. Chuir Cill Chainnigh stop le tosaithe Tipp aon chomhordnú imeartha a chur ar siúl. Mar sin bhí Tipp ag cur liathróidí arda isteach agus bhí sé éasca do na cosainteoirí srian a choimeád orthu. Ar an taobh eile cé is moite de Mick Fennelly agus an 2-3 a fuair sé bhí tosaithe Chill Chainnigh ag fáil deacair impreisiún a dhéanamh i gcoinne cosainteoirí Tiobraid Árainn agus ní raibh ach 4 phointe eile scóráilte sa chéad leath, dhá cheann faighte ag Lester Ryan ó lár na páirce san áireamh.
Uaireanta  bíonn conspóid ann nuair a chuirtear daoine den bpáirc. Ní fhaca mé an eachtra go léir ach caithfear a ghlacadh go bhfaca na moltóirí chúil an eachtra ó thus go deireadh. Chonaic mé cuid de i ndiaidh an chluiche cúpla uair agus ní fhéadfadh JJ Delaney aon ghearáin a bheith aige. Caithfear a rá  freisin  gur dhein Barry Kelly an –mhaith mar a dheighleáil sé leis an eachtra. Chomh luath is a fuair sé an scéal, ina chluas is dócha ó dhuine de na moltóirí, stop sé an imirt, labhair sé leis na moltóirí chúil agus ansin thug sé na cártaí dearga amach. Is trua gur tharla an eachtra mar ní raibh an cluiche salach go háirithe i gcomparáid le leath craobh na bliana seo chaite. Cé nach raibh an t-uafás eachtraí salacha caithfear a rá go raibh an t-ádh le Paul Curran nuair a

chuir sé stop le Michael Rice agus le Mick Fennelly nuair a thug sé buille dá chamán do Brendan Maher sa dara leath. Fuair an bheirt acu buí ach d’fhéadfadh dath eile a bheith orthu.
Níl aon bhata draíochta ag Cill Chainnigh. Is é an difríocht atá ann idir na Cait agus foirne eile ná an ráta oibre, aclaíocht, a neart, a méid, an luas fúthu agus dar ndóigh a scil. Is deacair do aon dream eile an bailiúcháin seo go léir a bheith acu agus ní raibh an bailiúcháin ag Tipp inné. Bhí tacaitheoirí Chill Chainnigh lán sásta leis an taispeántas ach ní raibh tacaitheoirí Tipp thíos ach an oiread. Níor chaill siad ach le trí phointe agus bhí roinnt acu den tuairim dá bhféadfadh Bonner Maher an seans iontach a fuair sé sa chéad leath a chríochnú bheidís níos chongarai fós no fiú ar chomh scór  gan bacaint leis an gcinneadh mí cheart a rinne an réiteoir nuair aghlaogh sé feall i gcoinne an Maher céanna do chéimeanna nuair a bhí an liathróid ar a chamán ar imeall cearnóg na gCat.
Is deacair aon fhoireann a fheiceáil ag sárú Cill Chainnigh sa chomórtas chraoibhe. Ceapaim nach raibh Tipp ag iarraidh a bpleananna go léir a thaispeáint  agus gur mhaith leo iad a choimeád i bhfolach don samhradh. Ach an sroichfidh siad Meán Fomhair? I 20 bliain, áit a raibh foirne ó chúige Mumhan i gcraobh an tSraith Náisíunta-19 daoibh ina n iomlán-níor sroich ach trí chin, Tipp in ’01 agus ’09 agus an Clár i ’95 Craobh na h

Éireann. Cad deireann siad faoi bhréaga agus staitisticí ? Ar an bhfianaise sin tá gach seans nach sroichfeadh Tipp an craobh in aon chor.
Ach beidh Cill Chainnigh ann.

Donal O’Grady, blog GAA Beo

Tomás Ó Flatharta

Roinn 2 – An Iarmhí v Doire
Cluiche teann a bhí anseo suas go dtí na nóiméadtaí deiridh. Bhí na foirne gob ar ghob tríd an gcluiche ar fad le pointií breátha ó i bhfad amach a fháil ag leaids na h-Iarmhí  agus scóranna iontacha ó James Kielt do Dhoire.
Bhí an lámh in uachtar i lár na páirce ag Patsy Bradley agus Ryan Bell den chuid is mó den gcluiche. Sa chéad cheathrú bhíodar ag cur caideanna tapaidh isteach go dtí na lán tosaithe áit ina raibh líne lán chúil na hIarmhí fé bhrú ag Eoin Bradley agus Raymond Wilkinson. Chun a gceart a thabhairt do Kevin Maguire agus John Gaffey fuaireadar teann sa mharcáil ina dhiaidh san agus ní raibh an saoirse céanna ag tosaithe Dhoire.
Fuair Denis Glennon, Ger Egan agus Callum McCormack pointí breátha don Iarmhí sa chéad leath agus chuir Dessie Dolan an chaid thar an dtrasnán 3 bhabhta tar éis dó teacht isteach sa dara leath. Ceapaim dá mbeadh Dolan tógtha isteach níos luaithe go mbeadh a thuilleadh pointí fachta acu.
Ba é báide Emmet McGuckin sa chúpla nóiméad deiridh a bhuaigh an chluiche do Dhoire. Chuir sé Gary Connaughton fé bhrú sa chearnóg nuair a tháinig caid ard isteach. Bhris an báideoir an chaid ach fuair McGuckin í agus chríochnaigh sé sa líon í. Bhí an chluiche in am breise ag an dtrath seo agus d’imigh an t-anam as an Iarmhí.

Roinn 1 – Áth Cliath v Tír Eoghain
Sa chluiche seo d’fhéadfadh aon cheann don dá fhoireann an bua a bheith acu. Bhí iontas orm nár thug an réiteoir cic saor do Thír Eoghain sa nóiméad deirneach nuair a bhí ceann tuillte acu. Dá mbeadh sé fachta bhí seans acu an chluiche a chríochnú ar chomh scór . Os ag caint ar réiteoireacht, bhí difríocht mór idir an slí a dhéanfadh ceannasaíocht ar an dá chluiche. Do thuill an dá fhoireann a gcuid ciceanna saor sa dara cluiche seachas sa chéad cheann bhí an réiteoir ag séideadh do gach rud. Cé go raibh an imirt leamh go maith sa chéad leath bhí ard iomaiocht eathru tar éis an bhriseadh. Sa leath seo bhí culaithe Thír Eoghain ar fheabhas agus dhún siad síos tosaithe na dubs go mórmhór Bernard Brogan. Sé Brogan ceann dos na tosaithe is fearr sa tír ach ní bhfuair sé aon scór ón imirt agus tógadh amach é roimh deireadh. ‘Sé Cathal McCarron an cúlaí go bhfuil an moladh is mó ag dul do.  Bhí sé ar fheabhas tríd an gcluiche ar fad.
Bhí lá maith leis ag Conor McAliskey a d’imir in ionad Stephen O’Neill a bhí gortaithe. Fuair sé trí phointe ón imirt agus beidh sé ag súil le áit a fháil i gcoinne Dhún na nGall i gceann mí eile sa chraobh .
Ó taobh na Dubs do ní raibh siad chomh maith agus a bhí sa tsraith go dtí seo. Sna tosaithe d’imigh Connolly amach as an gcluiche tar éis tús mhaith a bheith aige agus seachas Mannion agus Andrews níor dhein an chuid eile acu mórán. Is é Dean Rock a fuair dhá phointe iontach tar éis dó teacht isteach, a chas an chluiche dóibh. Beidh sé ag súil le rith a fháil sa chraobh tar éis an éacht a dhein sé.
Teist ana mhaith a bhí ann do Thír Eoghain dá gcluiche i gcoinne leaids Jim McGuinness. Rud nach gcabhróidh le Dún na nGall ná go mbeidh dhá mhí ann sular mbeidh cluiche ceart tareis a bheith acu. Mar sin féin beidh gach éinne ag súil leis an gcluiche.
Do na Dubs ní dóigh liom go mbeidh aon stró orthu Cúige Laighean a bhuachaint.

Tomás Ó Flatharta, blog GAA Beo

Donal O’Grady

Caithfear a rá go bhfuil se tuillte go maith ag an gClár go bhfuil siad ag fanacht i Roinn 1A i 2014. An bhfuil ráta fóirthíl níos airde  ná 24 le fáil in aon chluiche iomána siar sa stair? Is fíor annamh go bhfeiceann tú beirt chomh óg le Tony Kelly agus Colm Galvin agus tionchar chomh mór sin acu ar chluiche chomh tabhachtach leis an gceann inné. Is fíor annamh freisin go bhfeictear 9 bpointe á scóráil ó lár na páirce. Tá imreoirí ag Davy Fitzgerald anois atá in ann pointí a scóráil. Léiríodh é sin inné. Más féidir le Darach Honan feabhsú beagáinín ó thaobh iomána agus aclaíochta de ní fada uainn scórálaí chúil chomh maith – píosa deiridh an jigsaw don bhainisteoir. Ní fhacamar críoch na sraithe fós ach caithfidh mise a rá go raibh mé an- tógtha leis. Measaim go nbíonn i bhfad níos mó dáiríreachta ag baint leis na cluichí agus ní bhíonn aon chluiche ar nós “is cuma liom” le dream láidir ag tabhairt léasadh do fhoireann lag mar a bhíodh sé sna sraitheanna éagsúla síos tríd na blianta le grúpaí móra agus deighilt mór idir an ráta cumais i measc na bhfoirne éagsúla. Tá mórán daoine á rá go bhfuil siad mí shásta leis an structúr. Dar ndóigh bíonn a chlár féin ag gach duine a bhfuil moladh aici/aige. Im’ thuairim tá an leagan amach atá acu faoi láthair ag obair agus seans á thabhairt do fhoirne nach bhfuil ró láidir, m.sh.Aontroim agus Ceatharlach i mbliana taithí a fháil i gcoinne  contaethe traidisiúnta nach bhfuil ar bharr an chrainn mar a déarfá.
Tá roinnt a rá go mba chóir 8 nó 10 bhfoireann a bheith i roinn 1A. Trialadh an structúr sin na blianta ó shin. Má chuirtear 8 i roinn 1A is féidir dearmad a dhéanamh d’aon chontae eile leasmuigh díobh sin. Cad é an mhaitheas do Offaly agus Wexford a bheith ag imirt in aghaidh contaethe ina mbeidh fíor bheagán suime leis an toradh ar fáil sula gcaitear isteach an liathróid. Má bhíonn dícháiliú agus teacht aníos ón roinn faoi bhun beidh sé mar an gcéanna dona chontaethe nua ó Roinn 1A a thitfidh síos agus don chontae ó Roinn 1B a thiocfaidh in airde. Beidh cluichí aontaobhach ann. Cinnte oirfidh sé sin do bhainisteoirí faoi leith ach nach bhfuil freagracht ag CLG do na tacaitheoirí a íocann a gcuid airgid isteach chuig na cluichí agus caithfear a admháil go raibh na cluichí i mbliana thar a bheith suimiúil.
Beidh Corcaigh thíos i 1B i 2014. Tá súil agam nach mbeidh aon athrú sa structúr. Bhí rialacha ar bun don chomórtas a bhí ar eolas go maith ag gach contae. Bhí an structúr céanna ann i 2012 nuair a chaill B.Á.C a áit. Ní raibh aon ghearáin ó na Dubs. Ghlac siad le cúrsaí. D’oibrigh siad go dian dícheallach agus bhuaigh siad a náit ar ais i 1A arís. Níl aon gheallúint ann go mbeidh foireann níos fearr trí a bheith ag imirt i gcoinne 9 gcontae eile atá ar bharr. Léiríonn an sraith peile é seo. Tháinig Tír Eoghain agus Cill Dara in airde anuraidh ó Roinn 2. Shroich an dá fhoireann na leath chraobh an bhliain seo. Níl ann ach bliain agus tá seans ag CLG  anois comórtas ceart a dhéanamh i 1A agus 1B agus suim a chothú iontu a leanfaidh ar aghaidh seachas dul siar go foirmle a theip  roimhe seo.

Donal O’Grady, blog GAA Beo

Tomás Ó Flatharta

Bhí an-sheachtain ag imreoirí chaide Chiarraí. Saoire sa Phortaingéil, bua ar Thír Eoghan san Omaigh agus cinntiú go bhfanann siad i Roinn a hAon.

Tar éis mórán cainte sna meáin i rith na seachtaine go mbeadh cogadh dearg idir na foirne, ní shin mar a bhí. Thug Ciarraí taispeantas breá uatha sa chéad 35 nóiméad. Bhíodar ag imeacht chun cinn go láidir leis an gcaid agus pasáil maith ar siúl acu, na tosaithe ag taispeáint go maith agus scóranna ag teacht ó mórán imreoirí difriúla.

Ón dtaobh eile den scéal, ní raibh Tír Eoghain san imirt in aon chor. Do fhoireann atá le blianta iontach ag cosaint agus ag taicleáil níor chuireadar lámh nó barra méir ar imreoirí Chiarraí. Bhí imreoirí Chiarraí ag rith tríthu go furaist. Deinim amach go mbeadh siad an-dhíomách leis seo agus níl dabht ná go raibh focail ag Mickey Harte leo ag leath ama.

Ba é Colm Cooper rí imreoirí Chiarraí sa chéad leath seo. Do bhuaigh sé mórán caide agus chuir sé gach ceann acu i bhfearas go hiontach, chomh maith le cúpla pointe a chiceáil. Is cosúil le sean mhadra é leis an ngliceas atá ann.

An fear is mó a bhain tairbhe as a ghliceas agus as a chuid pasanna breátha ná Kieran Donaghy. Bhí sár-chluiche ag Donaghy inniu.

Le naoi bpointe idir na foirne ag leath ama, dúshlán mór a bhí ann do Thír Eoghain ach bhí an ghaoth acu sa dara leath agus seans acu dá bharr. Ní go dtáinig Martin Penrose, Conor Clarke agus Conor Gormley ar an ngort go dtáinig aon spiorad ionta áfach.

Anois thosnaíodar ag fáil scóranna agus thosnaigh an slua ag liúirigh. Go deimhin fuaireadar sé bpointe as a chéile sa dara leath céanna agus ba an-theacht aniar a bhí ann. Ach ansin chuadar 14 nóiméad roimh an deireadh gan aon scór a fháil agus b’shin a chuir deireadh leis an moiminteam.

Cé go ndéanadar gach iarracht ag an deireadh an cluiche a chuir ar chomh scór nó a bhuachaint, sheas leithéidí Kieran Donaghy, Marc Ó Sé, Johnny Buckley agus Colm Cooper an fód go hiontach ar fad do Chiarraí.

Do Thír Eoghain, tá cluiche leathcheannais acu an tseachtain seo chugainn agus b’fhéidir cluiche breise ina dhiaidh sin fiú, a chabhróigh leo feabhas a chuir orthu fhéin roimis an gCraobhchomórtas i gcoinne Dhún na nGall.

Ní fada uainn an 26 Bealtaine anois agus beidh an dá fhoireann seo amuigh ar an lá céanna i gcoinne Thiobrad Árainn agus Dhún na nGall. Ciarraí lán de dhóchas i ndiaidh an tseachtain a bhí acu agus Tír Eoghain? Bhuel neosfaidh an aimsir.

Tomás Ó Flatharta, blog GAA Beo

Cathal Moore

Teacht aniar iontach sa dara leath ag Naomh Feargal.  Fiche nóiméad le dul agus Gairmscoil Bhríde chun tosaigh 0-12 0-2 ar chlár na scór.  Níor scóráil Gairmscoil Bhríde ach cúilín amháin eile.  Ceard a tharla?  D’athraigh Naomh Feargal an plean imeartha.  Thosaigh siad ag cur sliotar díreach isteach go dtí an lán tosaí Daire Quinlan agus chruthaigh sé an-chuid deacrachtaí do Garry McHugo.  D’imir Mark Kavanagh agus Aidan Corby thar cionn sa dara leath ach is sa líne leath cúil a tógadh an bua seo.  Thug Bill Meade agus Robbie Phelan an-taispeántas ach ní raibh amhras ar bith faoi laoch na himeartha an leath cúlaí láir Gavin Dunne.  Bhí an-choimhlint idir an lán cúlaí Eoin Doyle agus Brian Molloy.

Beidh aifeála ar fhoireann Ghairmscoil Bhríde.  Bhí an cuma ar an scéal go mbeadh bua éasca acu agus deich nóiméad caite sa dara leath ach ansin chaill siad Darragh Dolan ar feadh deich nóiméad de bharr gortú fola.  As sin amach chaill siad an greim a bhí acu lár páirce.  Chuireadar an iomarca seansanna ar foraoil freisin, deich gcinn ar fad.  Rinne Declan Cronin, Patrick Prendergast, Eanna Burke, Brian Dolan, Daniel Nevin, Brian Molloy agus Jamie Ryan a ndícheall.

Bua mar sin do Naomh Feargal nach raibh éinne ag súil leis roimh an chluiche ná fiú ag leath ama!

Cluiche Ceannais Corn an Chrócaigh –  CBS Chill Chainnigh v Coláistí Dhún Gharbhán – 6/4/2013

Tar éis deich nóiméad bhí sé easca a thuiscint go raibh Coláistí Dhún Gharbhán mar rogha na coitianta roimh an chluiche seo inniú.  Bhíodar ag imirt thar barr agus in uachtar ar fud na páirce.  Dá mbeadh an cluiche seo caillte acu bheadh áiféala orthu gan amhras.  Bhí an líne leath thosaigh Criostóir Breathnach, Michael Harney agus Séamus Keating an- láidir san aer agus fuair siad tacaíocht iontach ó Chormac Curran agus Colin Dunford lár páirce.  Chuireadar ocht seans ar foraoil sa chéad leath i gcomparáid le péire d’fhoireann CBS.  Cé go raibh CBS ag straicailt ar fud na páirce choinnigh Paddy Cahill iad sa chluiche sa chéad leath.

Nuair a cuireadh an lán cúlaí CBS Evan Cody den pháirc bhí chuile dhuine ag súil le bua easca do bhuachaillí Phort Láirge.  B’iad CBS a fuair spreagadh ón eachtra agus deich nóiméad le dul ní raibh ach trí chúilín idir na foirne.  Ach ansin chas an taoide arís nuair a chaill CBS Kevin Kenny de bharr gortú.

Bua do Choláistí Dhún Gharbhán agus tuillte go maith acu.  D’imir Kevin Daly agus Tom Devine ar fheabhas sna cúlaithe.  Thug an lán tosaí ar chlé Patrick Curran sárthaispeántas inniú.  Chríochnaigh sé le 0-07 agus ba é an difir idir na foirne.  Coinnigí súil amach do sa todhchaí.  B’fhéidir go bhfuil freagra ag Port Láirge do chailliúint Paul Flynn ar deireadh!

Sraith Iomána Allianz – Cluiche Ceannais Roinn 1B – Áth Cliath v Luimneach – 6/4/2013

Beidh John Allen agus foireann Luimnigh an-díomach leis an toradh seo.  Bhí siad glan in uachtar ar fud na páirce sa chéad leath.  Bhí an líne leath cúil de Paudie O Brien, Wayne McNamara agus Gavin O Mahony dochloíte.  Bhíodar míchruinn agus chuireadar ocht gcinn ar foraoil sa tréimhse seo.

Is iad na hathruithe a rinne Anthony Daly sa dara leath a bhuaigh an cluiche seo do Bhleá Cliath.  Bhain sé John McCaffrey, Conal Keaney agus Conor McCormack den pháirc agus chuir sé Danny Sutcliffe lár páirce.  Chiúnaigh Ryan O Dwyer Wayne McNamara agus scóráil beirt eile a tháinig isteach David Treacy agus Niall McMorrow cúilín ón imirt.  Ach coimhlint é seo idir Declan Hannon (1-07) agus Paul Ryan (1-06) agus na pocanna saora.  Ní raibh caighdeán na himeartha iontach agus léirigh sé sin an tábhacht a bhain leis an gcluiche.  Ní cabhair ar bith dromchla na páirce a bhí garbh go maith.

Liam Rushe a d’imir mar leath chúlaí láir a fuair laoch na himeartha.  Bhí sé dochloíte agus is dócha ansin a bheidh sé don chraobh.  Bhí David O Callaghan an-fheicéalach i rith an chluiche freisin.  Rinne Alan Nolan cúpla sábháil iontach sa chéad leath agus is í an cheist anois ná an mbeidh Gary Maguire ábalta a áit a fháil ar ais?   Duais iontach faighte ag Bleá Cliath.  Ní amháin go mbeidh siad ag imirt i Roinn 1A an bhliain seo chugainn ach cluiche leathcheannais sraithe bainte amach acu freisin.  Tiobraid Árann ag fanacht leo ansin.  Ullmhúchán iontach do chraobh i bhfad níos fearr ná coícís ag traenáil.

Cathal de Mórdha, blog GAA Beo

Cathal Moore

Bhí sé deacair a thuiscint go raibh Gaillimh mar rogha na coitianta roimh an chluiche seo.  Bhíodar ag imirt as baile agus bhí Port Láirge tar éis Tiobraid Árann a bhuaileadh, foireann a thug greadadh do Ghaillimh coícís ó shin.  Bhí an pháirc thar cionn i bPáirc an Bhreathnaigh ach bhí gaoth an-láidir ag séideadh.  Cluiche an-thaitneamhach ó thus deireadh.

Rinne Gaillimh trí athrú sular thosaigh an cluiche.  Tháinig David Burke , Conor Cooney agus Niall Burke isteach in ionad Damien Hayes, Jonathan Glynn agus Andrew Smith.  Bhí cuma an-láidir ar líne leath thosaigh na Gaillimhe le Joe Canning, Conor Cooney agus Niall Burke.  Shocraigh Gaillimh imirt in aghaidh na gaoithe agus léirigh an cinneadh sin an féinmhuinín a bhí acu astu féin.  Bhí an dá fhoireann cothrom go maith sa chéad cheathrú ach diaidh ar ndiaidh d’éirigh le fir na dTreabh an lámh in uachtar a fháil lár páirce.  D’imir Joseph Cooney agus go háirithe Iarlaith Tannion thar cionn.  Chuir Port Láirge an iomarca seansanna ar foraoil sa chéad leath ón imirt agus ó phocanna saora.  Bhí farasbarr de chúig phointe idir na foirne ag leath ama agus na Gaillimhigh i bhfad níos sásta leo féin.

D’fheabhasaigh imirt Phort Láirge sa dara leath.  Rinneadar iarracht Seamus Prendergast a thabhairt isteach níos minicí san imirt agus chruthaigh sé an-chuid deacrachtaí do Kevin Hynes ar imeall na cearnóige.  Bhí an bua sa deireadh tuillte ag fir an iarthair.  D’éirigh leo pointí a aimsiú níos easca.  Scóráil seisear ón imirt agus ba é Davy Glennon laoch na himeartha.  Chríochnaigh sé le ceithre chúilín ón imirt agus bhí an-choimhlint idir é agus Ian Daniels.

Ar thaobh Port Láirge beidh siad diomách ach chailleadar an cluiche seo sa chéad leath.  Níor scóráil siad ach trí phointe le comhair na gaoithe agus ní leor é sin.  D’imir Darragh Fives sárchluiche sa leath líne cúl ina chéad cluiche sraithe agus rinne Maurice Shanahan an-mhaith leis na pocanna saora sa dara leath.

Beidh Gaillimh ag imirt i gcluiche leathcheannais na sraithe i gceann trí seachtaine. Na Cait a bheidh ag fanacht!  Sin scéal eile do lá eile!  Inniú bhíodar an-sásta lena mbua ar Phort Láirge don chéad uair ó 2005!

Cathal de Mórdha, blog GAA Beo