BLOG GAA BEO

Sraith Peile Allianz – Roinn 1, Babhta 7 – Tír Eoghain v Ciarraí – 7/4/2013

Tomás Ó Flatharta

Bhí an-sheachtain ag imreoirí chaide Chiarraí. Saoire sa Phortaingéil, bua ar Thír Eoghan san Omaigh agus cinntiú go bhfanann siad i Roinn a hAon.

Tar éis mórán cainte sna meáin i rith na seachtaine go mbeadh cogadh dearg idir na foirne, ní shin mar a bhí. Thug Ciarraí taispeantas breá uatha sa chéad 35 nóiméad. Bhíodar ag imeacht chun cinn go láidir leis an gcaid agus pasáil maith ar siúl acu, na tosaithe ag taispeáint go maith agus scóranna ag teacht ó mórán imreoirí difriúla.

Ón dtaobh eile den scéal, ní raibh Tír Eoghain san imirt in aon chor. Do fhoireann atá le blianta iontach ag cosaint agus ag taicleáil níor chuireadar lámh nó barra méir ar imreoirí Chiarraí. Bhí imreoirí Chiarraí ag rith tríthu go furaist. Deinim amach go mbeadh siad an-dhíomách leis seo agus níl dabht ná go raibh focail ag Mickey Harte leo ag leath ama.

Ba é Colm Cooper rí imreoirí Chiarraí sa chéad leath seo. Do bhuaigh sé mórán caide agus chuir sé gach ceann acu i bhfearas go hiontach, chomh maith le cúpla pointe a chiceáil. Is cosúil le sean mhadra é leis an ngliceas atá ann.

An fear is mó a bhain tairbhe as a ghliceas agus as a chuid pasanna breátha ná Kieran Donaghy. Bhí sár-chluiche ag Donaghy inniu.

Le naoi bpointe idir na foirne ag leath ama, dúshlán mór a bhí ann do Thír Eoghain ach bhí an ghaoth acu sa dara leath agus seans acu dá bharr. Ní go dtáinig Martin Penrose, Conor Clarke agus Conor Gormley ar an ngort go dtáinig aon spiorad ionta áfach.

Anois thosnaíodar ag fáil scóranna agus thosnaigh an slua ag liúirigh. Go deimhin fuaireadar sé bpointe as a chéile sa dara leath céanna agus ba an-theacht aniar a bhí ann. Ach ansin chuadar 14 nóiméad roimh an deireadh gan aon scór a fháil agus b’shin a chuir deireadh leis an moiminteam.

Cé go ndéanadar gach iarracht ag an deireadh an cluiche a chuir ar chomh scór nó a bhuachaint, sheas leithéidí Kieran Donaghy, Marc Ó Sé, Johnny Buckley agus Colm Cooper an fód go hiontach ar fad do Chiarraí.

Do Thír Eoghain, tá cluiche leathcheannais acu an tseachtain seo chugainn agus b’fhéidir cluiche breise ina dhiaidh sin fiú, a chabhróigh leo feabhas a chuir orthu fhéin roimis an gCraobhchomórtas i gcoinne Dhún na nGall.

Ní fada uainn an 26 Bealtaine anois agus beidh an dá fhoireann seo amuigh ar an lá céanna i gcoinne Thiobrad Árainn agus Dhún na nGall. Ciarraí lán de dhóchas i ndiaidh an tseachtain a bhí acu agus Tír Eoghain? Bhuel neosfaidh an aimsir.

Tomás Ó Flatharta, blog GAA Beo

Cluiche Ceannais Iomána na nGairmscol – Coláiste Naomh Feargal v Gairmscoil Bhríde – 6/4/2013

Cathal Moore

Teacht aniar iontach sa dara leath ag Naomh Feargal.  Fiche nóiméad le dul agus Gairmscoil Bhríde chun tosaigh 0-12 0-2 ar chlár na scór.  Níor scóráil Gairmscoil Bhríde ach cúilín amháin eile.  Ceard a tharla?  D’athraigh Naomh Feargal an plean imeartha.  Thosaigh siad ag cur sliotar díreach isteach go dtí an lán tosaí Daire Quinlan agus chruthaigh sé an-chuid deacrachtaí do Garry McHugo.  D’imir Mark Kavanagh agus Aidan Corby thar cionn sa dara leath ach is sa líne leath cúil a tógadh an bua seo.  Thug Bill Meade agus Robbie Phelan an-taispeántas ach ní raibh amhras ar bith faoi laoch na himeartha an leath cúlaí láir Gavin Dunne.  Bhí an-choimhlint idir an lán cúlaí Eoin Doyle agus Brian Molloy.

Beidh aifeála ar fhoireann Ghairmscoil Bhríde.  Bhí an cuma ar an scéal go mbeadh bua éasca acu agus deich nóiméad caite sa dara leath ach ansin chaill siad Darragh Dolan ar feadh deich nóiméad de bharr gortú fola.  As sin amach chaill siad an greim a bhí acu lár páirce.  Chuireadar an iomarca seansanna ar foraoil freisin, deich gcinn ar fad.  Rinne Declan Cronin, Patrick Prendergast, Eanna Burke, Brian Dolan, Daniel Nevin, Brian Molloy agus Jamie Ryan a ndícheall.

Bua mar sin do Naomh Feargal nach raibh éinne ag súil leis roimh an chluiche ná fiú ag leath ama!

Cluiche Ceannais Corn an Chrócaigh –  CBS Chill Chainnigh v Coláistí Dhún Gharbhán – 6/4/2013

Tar éis deich nóiméad bhí sé easca a thuiscint go raibh Coláistí Dhún Gharbhán mar rogha na coitianta roimh an chluiche seo inniú.  Bhíodar ag imirt thar barr agus in uachtar ar fud na páirce.  Dá mbeadh an cluiche seo caillte acu bheadh áiféala orthu gan amhras.  Bhí an líne leath thosaigh Criostóir Breathnach, Michael Harney agus Séamus Keating an- láidir san aer agus fuair siad tacaíocht iontach ó Chormac Curran agus Colin Dunford lár páirce.  Chuireadar ocht seans ar foraoil sa chéad leath i gcomparáid le péire d’fhoireann CBS.  Cé go raibh CBS ag straicailt ar fud na páirce choinnigh Paddy Cahill iad sa chluiche sa chéad leath.

Nuair a cuireadh an lán cúlaí CBS Evan Cody den pháirc bhí chuile dhuine ag súil le bua easca do bhuachaillí Phort Láirge.  B’iad CBS a fuair spreagadh ón eachtra agus deich nóiméad le dul ní raibh ach trí chúilín idir na foirne.  Ach ansin chas an taoide arís nuair a chaill CBS Kevin Kenny de bharr gortú.

Bua do Choláistí Dhún Gharbhán agus tuillte go maith acu.  D’imir Kevin Daly agus Tom Devine ar fheabhas sna cúlaithe.  Thug an lán tosaí ar chlé Patrick Curran sárthaispeántas inniú.  Chríochnaigh sé le 0-07 agus ba é an difir idir na foirne.  Coinnigí súil amach do sa todhchaí.  B’fhéidir go bhfuil freagra ag Port Láirge do chailliúint Paul Flynn ar deireadh!

Sraith Iomána Allianz – Cluiche Ceannais Roinn 1B – Áth Cliath v Luimneach – 6/4/2013

Beidh John Allen agus foireann Luimnigh an-díomach leis an toradh seo.  Bhí siad glan in uachtar ar fud na páirce sa chéad leath.  Bhí an líne leath cúil de Paudie O Brien, Wayne McNamara agus Gavin O Mahony dochloíte.  Bhíodar míchruinn agus chuireadar ocht gcinn ar foraoil sa tréimhse seo.

Is iad na hathruithe a rinne Anthony Daly sa dara leath a bhuaigh an cluiche seo do Bhleá Cliath.  Bhain sé John McCaffrey, Conal Keaney agus Conor McCormack den pháirc agus chuir sé Danny Sutcliffe lár páirce.  Chiúnaigh Ryan O Dwyer Wayne McNamara agus scóráil beirt eile a tháinig isteach David Treacy agus Niall McMorrow cúilín ón imirt.  Ach coimhlint é seo idir Declan Hannon (1-07) agus Paul Ryan (1-06) agus na pocanna saora.  Ní raibh caighdeán na himeartha iontach agus léirigh sé sin an tábhacht a bhain leis an gcluiche.  Ní cabhair ar bith dromchla na páirce a bhí garbh go maith.

Liam Rushe a d’imir mar leath chúlaí láir a fuair laoch na himeartha.  Bhí sé dochloíte agus is dócha ansin a bheidh sé don chraobh.  Bhí David O Callaghan an-fheicéalach i rith an chluiche freisin.  Rinne Alan Nolan cúpla sábháil iontach sa chéad leath agus is í an cheist anois ná an mbeidh Gary Maguire ábalta a áit a fháil ar ais?   Duais iontach faighte ag Bleá Cliath.  Ní amháin go mbeidh siad ag imirt i Roinn 1A an bhliain seo chugainn ach cluiche leathcheannais sraithe bainte amach acu freisin.  Tiobraid Árann ag fanacht leo ansin.  Ullmhúchán iontach do chraobh i bhfad níos fearr ná coícís ag traenáil.

Cathal de Mórdha, blog GAA Beo

Sraith Iomána Allianz – Roinn 1A, Babhta 5 – Port Láirge v Gaillimh – 31/3/2013

Cathal Moore

Bhí sé deacair a thuiscint go raibh Gaillimh mar rogha na coitianta roimh an chluiche seo.  Bhíodar ag imirt as baile agus bhí Port Láirge tar éis Tiobraid Árann a bhuaileadh, foireann a thug greadadh do Ghaillimh coícís ó shin.  Bhí an pháirc thar cionn i bPáirc an Bhreathnaigh ach bhí gaoth an-láidir ag séideadh.  Cluiche an-thaitneamhach ó thus deireadh.

Rinne Gaillimh trí athrú sular thosaigh an cluiche.  Tháinig David Burke , Conor Cooney agus Niall Burke isteach in ionad Damien Hayes, Jonathan Glynn agus Andrew Smith.  Bhí cuma an-láidir ar líne leath thosaigh na Gaillimhe le Joe Canning, Conor Cooney agus Niall Burke.  Shocraigh Gaillimh imirt in aghaidh na gaoithe agus léirigh an cinneadh sin an féinmhuinín a bhí acu astu féin.  Bhí an dá fhoireann cothrom go maith sa chéad cheathrú ach diaidh ar ndiaidh d’éirigh le fir na dTreabh an lámh in uachtar a fháil lár páirce.  D’imir Joseph Cooney agus go háirithe Iarlaith Tannion thar cionn.  Chuir Port Láirge an iomarca seansanna ar foraoil sa chéad leath ón imirt agus ó phocanna saora.  Bhí farasbarr de chúig phointe idir na foirne ag leath ama agus na Gaillimhigh i bhfad níos sásta leo féin.

D’fheabhasaigh imirt Phort Láirge sa dara leath.  Rinneadar iarracht Seamus Prendergast a thabhairt isteach níos minicí san imirt agus chruthaigh sé an-chuid deacrachtaí do Kevin Hynes ar imeall na cearnóige.  Bhí an bua sa deireadh tuillte ag fir an iarthair.  D’éirigh leo pointí a aimsiú níos easca.  Scóráil seisear ón imirt agus ba é Davy Glennon laoch na himeartha.  Chríochnaigh sé le ceithre chúilín ón imirt agus bhí an-choimhlint idir é agus Ian Daniels.

Ar thaobh Port Láirge beidh siad diomách ach chailleadar an cluiche seo sa chéad leath.  Níor scóráil siad ach trí phointe le comhair na gaoithe agus ní leor é sin.  D’imir Darragh Fives sárchluiche sa leath líne cúl ina chéad cluiche sraithe agus rinne Maurice Shanahan an-mhaith leis na pocanna saora sa dara leath.

Beidh Gaillimh ag imirt i gcluiche leathcheannais na sraithe i gceann trí seachtaine. Na Cait a bheidh ag fanacht!  Sin scéal eile do lá eile!  Inniú bhíodar an-sásta lena mbua ar Phort Láirge don chéad uair ó 2005!

Cathal de Mórdha, blog GAA Beo

Sraith Iomána Allianz – Roinn 1A, Babhta 5 – Cill Chainnigh v Corcaigh – 31/3/2013

Pat Fleury

Tháinig Corcaigh go Páirc Uí Nualláin agus thaispeáin siad go bhfuil dul chun cinn thar cuimse déanta acu agus thug siad taispeántas den scoth. Bhí siad díograiseach agus diongbháilte agus bhí an taispeántas maith go leor chun foireann ar bith a bhualadh………ach amháin Cill Chainnigh, b’fhéidir.
Thosaigh Corcaigh go láidir agus ba cheart dóibh bheith níos faide chun tosaigh ag leathama ach tharraing Cill Chainnigh ar-ais isteach iad agus chríochnaigh siad an chéad leath ar chomhscór. Bhí a fhios ag imreoirí Chill Chainnigh go mbeadh orthu iarracht níos mó a dhéanamh sa dara leath mar bhí áit ins na cluichí leath-cheannaise ar fáil. Bhí Richie Hogan(0-4), Richie Power(0-3)agus Colin Fennelly(0-4) i bhfad sa dara leath agus thug Michael Fennelly ana cheannasaíocht dóibh ó lár na páirce agus chríochnaigh sé an scóráil le cúilín iontach. Níor éirigh le Cill Chainnigh cúl ar bith a scóráil ar an lá – rud a chruthaíonn go raibh  cúlaithe Chorcaí ag déanamh go hana mhaith. D’aimsigh Corcaigh dhá chúl – ceann ó Conor Lehane, a chríochnaigh le 1-3, agus ceann eile ó Luke Farrell, a fuair 1-1. Beidh díomá ar JBM agus a roghnóirí leis an toradh ach ceapaim go mbeidh siad lánsásta leis an meoin aigne a bhí ag na himreoirí agus an forbairt atá déanta acu.
Beidh cluiche crua acu i gcoinne na Cláirínigh ag an deireadh seachtaine ins na babhtaí dícháilithe agus beidh na Cait ag tnúth le cluiche leathcheannais i gcoinne na Gaillimhigh, a fuair an ceann is fear orthu sa chéad bhabhta.
Beimid go leir ag tnúth leis an gcluiche sin!

Pat Fleury, blog GAA Beo

Sraith Iomána Allianz – Roinn 1A, Babhta 5 – Cill Chainnigh v Corcaigh – 31/3/2013

Donal O’Grady

Bhí Corcaigh in aghaidh Chill Choinnigh thar a bheith suimiúil.Gan dabht bhí na Cait níos fearr. Bhí an bua tuillte acu mar bhí na fir acu chun scóranna d’fháil in am an ghátair díreach roimh leath ama agus ón  47ú nóimead ar aghaidh. Bhíodar trí phointe chun deiridh ach nach léirigh siad a gcumhacht ansin.  Naoi bpointe as sin go dtí an deireadh acu áit a bhfuair Corcaigh ceann amháin-poc saor ó Pat Horgan. Fuair Corcaigh dhá chúl maith agus bhúí cúpla leath sheans acu. Is deacair a dhéanamh amach an bhfuil sleamhnú beag ann sa chosaint mar ní fhéachann an aonad chosanta chomh teann is a bhíonn siad de ghnáth. Níor fhéach Jackie Tyrell nó JJ Delaney ar bharr a gcumhacht. É sin ráite bhí Paul Murphy in easnamh agus is cailliúint é sin i gcónaí.

Tá cluiche dian le bheith ag Corcaigh anois leis an gClár. Beidh sé suimiúil ach ba chóir go mbeadh na ceachtanna a mhúineadh do Chorcaigh sa tríú bhabhta foghlamtha go maith acu. Tá Cill Choinnigh sa leath chraobh agus beidh an coimhlint leis an nGailllimh an-shuimiúil go háirithe leis na cluichí eatarthu i 2012.

Caithfidh mé a rá go raibh an sraith go hiontach. N’fheadar cén fáth go bhfuil athraithe á dhéanamh le ceathrú craobhanna. Is do chúrsaí airgid atá na hathraithe á dhéanamh ach ní thuigim cén fath go bhfuil an coimhlint idir an ceithre ar bharr roinn 1A agus 1B. Fágfar amach a 5 agus 6 in 1A agus ligfear isteach 1,2,3,4 as roinn B. Chun é sin a dhéanamh i gceart bheadh ar an GAA dul ar ais go dhá roinn le sé fhoireann i ngach roinn – rud a chiallódh go mbeadh cluichí aontaobhacha ann. Cén fáth nár ligeadh mar atá anois ach dhéanfainn 2 athrú

1.Bheadh na leath chraobh idir an ceithre fhoireann ar bharr 1A le buntáiste an bhaile acu in áit a haon is a dó

2. Bheadh ar bhuaiteoirí 1B imirt i gcoinne an chontae a chailleann an cluiche dí cháilithe in 1A. Mar shampla i mbliana d’imreodh Clár agus Corcaigh/Luimneach agus Áth Cliath. Cibé a chaillfeadh idir an Clár agus Corcaigh d’imreoidís i gcoinne buaiteoirí an cluiche eile. Cibé contae a bhuafadh, bheidís i Roinn 1A an bhliain dar gcionn. I mbliana fuaireamar comórtas ceart sa sraith. Nach é comórtas a mheallann lucht féachana teilifíse agus beo go dti na cluichí?!

Donal O’Grady, blog GAA Beo

Sraith Iomána Allianz – Roinn 1A, Babhta 3 – Gaillimh v Tiobraid Arann – 18/3/2013

Pat Fleury

Tá Tiobraid Árann ag feabhsú. Bhí sé soiléir ó thús an chluiche seo go raibh Tiobraid Árann lán dáiríre chun péire phointe a thógáil abhaile leo. Shocraigh siad síos go tapaidh agus nuair a fuair Brendan Maher cúl ó phoc sleasa tar éis trí nóiméad, bhí Gaillimh faoi bhrú. Bhí cosainteoirí na Gaillimhe ró-scaoilte agus rinne sé seo rudaí ró-éasca do thosaithe Thiobraid Árann sleamhnú tharstu agus scóranna a aimsiú. Ar an taobh eile den pháirc, bhí Paddy Stapleton, Michael Cahill agus Padraic Maher go mór chun cinn agus bhí tosaithe na Gaillimhe ag sreachailt chun aon rud a fháil uathu. Bhí bearna maith eatarthu ag leathama; 2-13 in aghaidh 1-9, le líne lán tosach Thiobraid Árann ag déanamh scrios-1-2 ó Shane Bourke, 0-3 ó John O’Dwyer – a chríochnaigh le 1-6 agus gradam Laoch na hImeartha- agus 0-5 ó Séamas Callanan, a bhí marfach ó na buillí saoire ar an lá. D’fheabhsaigh Gaillimh i ndiaidh leathama agus laghdaigh siad an farasbarr sin go trí chúilín ag am amháin, ach, ní don chéad uair, bhí siad ag brath don iomarca ar Joe Canning chun scóranna a fháil dóibh – 1-10 uaidh inné – agus nuair a fuair John O’Dwyer cúl , tar éis ionsaí láidir ó Brian O’Meara, bhí siad ar a gcompord arís agus chríochnaigh Lar Corbett seans maith le luas agus scil chun an ceathrú cúl a aimsiú dóibh. Níl aon dabht ach go bhfuil na Tiobraidigh tar éis an tubaiste a tharla dóibh sa chéad babhta a chur ina ndiaidh agus tá siad ag obair go maith lena chéile arís. Má leanann siad ag imirt mar seo, beidh sé deacair iad a stopadh sa sraithchomórtas seo i mbliana.

Pat Fleury, blog GAA Beo